జలజల సాగే కవితాఝరీ
హృదయంలో ఉప్పొంగే కావ్యలహరి
జీవన రాగంలా ప్రవహించే రసమాధురి
మా కంటి వెలుగు గోదావరి
మా ఇంటి వేల్పు గోదావరి
మా బ్రతుకు తెరువు గోదావరీ…
మా కలత తీర్చు గోదావరీ… - ”గలగల పారే”
మహారాష్ట్రలో పరుగులు పెట్టి
అఖండ గోదావరిగ అవతరించి
గౌతమిగా దక్షిణ గంగగా
మనతోటల పాలిట జలనిధిగా
ప్రవహించే గొదావరి
మనలను కరుణించే గొదావరి
కరువు కాటకం కబళించే గోదావరీ…
సిరిసంపదలు కలిగించే గోదావరీ… - “గలగల పారే”
బాసరలో శారదతో ముచ్చటించి
మంజీర నాదంలో తన్మయించి
ప్రాణహిత రాగంతో
ఇంద్రావతి వేగంతో
శబరి సీలేరుల ప్రాభవంతో
తూరుపు కనుమల పాపిట తీసి
రాజమహేంద్రిలో రాజసమొలికి
గౌతమీ వశిష్టలుగా ద్వయమెత్తి
సాగరాన సంగమించు గోదావరీ…
ఉత్తుంగ తరంగ గంగ గోదావరీ … - “గలగల పారే”
